PS3 kwa kushirikiana na TAMISEMI watoa Kiongozi cha utaratibu wa Mafunzo elekezi ya awali kwa watumishi wapya wa sekretaieti za Mikoa na Mamlaka za Serikali za Mitaa

Imewekwa: August 22nd, 2017

Ofisi ya Rais- Tawala za Mikoa na Serikali za Mitaa (TAMISEMI) wakishirikiana na Mradi wa Uimarishaji Mifumo ya Sekta za Umma (PS3) wametoa Chapisho la Kiongozi cha Utaratibu wa Mafunzo elekezi ya awali kwa watumishi wapya wa sekretaieti za Mikoa na Mamlaka za Serikali za Mitaa. Akiongea katika utambulisho wa Kiongozi hiko kwa wakuu wa Idara Halmashauri ya Mji Kahama, Bw. Remmy Moshi ambaye ni Mshauri wa Rasilimali watu PS3 Shinyanga, amesema kuwa  Chapisho hilo limelenga kuweka utaratibu maalum wa utoaji wa mafunzo elekezi ya awali ili kuboresha utendaji kazi wa watumishi wapya na hivyo kuwa na utumishi wa Umma wenye tija, wenye kutatua changamoto  na utoaji wa huduma bora kwa wananchi. Aidha Bw. Moshi ameongeza kuwa utekelezaji wa Kiongozi hiki unatarajiwa kuleta manufaa yafuatayo kwa mtumishi mpya:

1. Kufahamu Dira, Dhima na Malengo ya Taasisi
2. Kufahamu haki na wajibu wake, viwango vya utekelezaji na utaratibu uliopo katika utekelezaji wake
3. Kufahamu mazingira na mbinu za kukabiliana na changamoto zilizopo
4. Kuimarisha Maadili ya Utumishi wa Umma na kujenga mahusiano mazuri baina ya mtumishi mpya na watumishi wenzake pamoja na jamii
5. Kuwasaidia watumishi wapya kubaki katika vituo vyao vya kazi na kutoa huduma bora kwa wananchi.