Magonjwa yaliyokuwa hayapewi kipaumbele yatupiwa Jicho

Imewekwa: July 3rd, 2018

Halmashauri ya Mji wa Kahama ni Moja kati ya Halmashauri zilizopangwa kufanya kampeni ya uelimishaji na utoaji wa dawa za Magonjwa yaliyokuwa hayapewi kipaumbele. Kampeni hii imelenga kundi kubwa la watoto wenye umri wa kati ya miaka 15 hadi 15.

Akiwasilisha taarifa kuhusu kampeni hii Mganga Mkuu wa Hospitali ya Mji wa Kahama Dkt. Lucas Ngamtwa amebainisha kuwa magonjwa haya ni yale ambayo yanapatikana katika jamii zetu na watu wanaathirika na madhara yake husambaa. Amesema kuwa mfano wa magonjwa haya ni pamoja na Kichocho na Minyoo.

Aidha Dkt. Ngamtwa amesema kuwa madhara yatokanayo na magonjwa haya ni pamoja na:

• Maumivu ya muda mrefu na wakati wakati mwingine ni ulemavu mkubwa
• huchangia umaskini na hudumaza uchumi wa familia na taifa kwa ujumla
• hudhoofisha ukuaji na maendeleo ya mtoto kimwili na kiakili
• kadiri muda unavoenda idadi ya waathirika na vifo vinaongezeka kutokana na kutopewa kipaumbele

"Magonjwa haya yanaweza kuzuirika katika jamii zetu kwa kutumia dawa za kutibu na kukinga, kuzingatia usafi wa mazingira, kutumia viatu kinga wakati wa kufanya shughuli kwenye mashamba na maeneo yenye majimaji ardhini n.k" Amesema Ngamtwa.

Utekelezaji wa zoezi hili la kitaifa linafanyika kwa kutumia fedha za wahisani kwa kupitia kitengo cha kudhibiti magonjwa yaliyokuwa hayapewi kipaumbele ambao ni USAID kupitia SCI.